Akwai tambayoyi da muke jiran amsa kafin buɗe iyakarmu da Benin – Janar Tiani
Shugaban gwamnatin sojin Nijar, Janar Abdourahamane Tiani, ya ce akwai tambayoyi da yake jiran dole sai mahukunta a Benin makwabciyarsu sun amsa kafin duba yiwuwar sake buɗe iyakar da ke tsakaninsu.
Wallafawa ranar:
Minti 1 Lokacin karatu
Janar Tiani wanda ya bayyana haka yayin wata doguwar hira da aka yi da shi a daren Asabar a talabijin na gwamnatin Nijar, kan cika shekaru uku da ɗarewarsa garagal mulki, bayan hambarar da shugaba Mohamed Bazoum, ya ce ƙasashen biyu makwabta sun amince da muhimmacin sake buɗe kan iyakokin a lokacin ziyarar da sabon shugaban Benin ya kai ƙasar, amma akwai batutuwa da suke jiran amsa daga Romuald Wadagni ya amsa su.
Ruwa mai yawa ya malalo a ƙarƙashin gadar; kuma akwai tabo da kuma raunuka da za a buƙaci maganinsu yadda ya kamata kafin yanke shawarar sake buɗe kan iyaka
An rufe wannan kan iyaka kusan shekaru uku, jim kaɗan bayan da gwamnatin soja a Niamey ta hau mulki a watan Yulin shekarar 2023, tana zargin maƙwabciyarta Benin da neman wargaza ta tare da goyon bayan Faransa.
Amma ziyarar sabon shugaban Benin, Romuald Wadagni, zuwa Nijar a farkon watan Yuni ta nuna raguwar tsamin dangantaka tsakanin ƙasashen biyu, waɗanda ke fuskantar tashe-tashen hankula daga mayakan masu ikirarin jihadi na ƙungiyoyi masu alaƙa da Al-Qaeda da Islamic State. Ziyarar Mr. Wadagni ta kuma bukaci sake buɗe kan iyakarsu nan ba da jimawa ba.
A cewarsa, dole ne a sake buɗe kan iyakar ta yadda babu wani shugaban ƙasar Benin ko na Nijar da zai sake yanke shawarar rufe ta da gangan.
A ƙarshen watan Afrilu, Niamey ta kafa sharuɗɗan da za a bi don sake buɗe kan iyakarta da Benin a lokacin wani taro a Cotonou tsakanin Ministan Harkokin Cikin Gida na Nijar, Janar Mohamed Toumba, da kwamitin ƙwararru masu kula da lamarin.
Nijar ta buƙaci, sanya hannu kan yarjejeniyar tsaro wadda ta kafa ƙa’idar rashin amfani da yankin wata ƙasa a kan ɗayan.
Crédit: Lien source