Ayi, tiɲɛ tɛ Côte d’Ivoire ntolantankulu degekaramɔgɔ kɔrɔ ma ta Mali fɛ, kunnafoni kolon don! – Kunnafoni kolonw fɛsɛfɛsɛli

Dɔw k’olu sewalen don a ko la, dɔw kɔni ko Côte d’Ivoire tun man kan ka nin degekaramɔgɔ in bila. Kasɔrɔ kuma in sinsinnen tɛ dalilu fosi kan. An baaraɲɔgɔnw y’o de fɛsɛfɛsɛ nin dɔgɔkun in na. 

Kunnafoni kolon in bɛ cogo di?

Videwo caman de bɛ ka yaala tiktok sanfɛ. O caman na i bɛ Emerse FAE foto ye, Côte d’Ivoire degekaramɔgɔ kɔrɔ. Mali ntolantannaw ka donfini b’a kan na. Videwo wɛrɛw la, i bɛ jaw tigɛ-tigɛlen ye ka tugu-tugu ɲɔgɔn na. Mali ntolantannaw bɛ nisɔndiyajira yɔrɔ o dɔw kɔnɔ, Emerse FAE fana bɛ ye o ja ninnu dɔw la, a bɛ ka taama, walima a ni mɔgɔ dɔw bɛ baro la. Kumakanw, minnu labɛnna ni hakiliduman dilannen ye, olu de bɛ ka ja ninnu bilasira. Olu b’a fɔ ko Emerse FAE sugandira ka kɛ Mali ntolantankulu degekaramɔgɔ kura ye. Wa n’i ye mɔgɔw ka hakilina fɔtaw ye videwo ninnu duguma, i b’a kɔrɔsi k’a fɔ u caman de dalen bɛ kuma in na. O yɛrɛ dɔrɔn, tiktok jakɛla caman ye kuma in ta, k’u yɛrɛ ka videwow kɛ n’a ye, u b’u ja ye videwo minnu na. U dɔw b’a fɔ ko nin ye hakilina ɲuman de ye, dɔw, olu bɛ k’u ka dusukasi jira Côte d’Ivoire faamanw na, o ko munna u ye Emerse FAE bila. Kasɔrɔ kuma in tɛ tiɲɛ ye. Kunnafoni kolon don.

Dalilu jumɛn b’i bolo min bɛ kuma in galontigiya sɛmɛntiya?

Fɔlɔ, nin kunnafoni in ma sɛmɛntiya mɔgɔ si fɛ. Emarse FAE m’a fɔ, Mali ntolantankulu m’a fɔ, wa kunnafonidiso fosi m’a lase.

Ka far’o kan, Mali ye degekaramɔgɔ kura a ka ntolantannaw ye kabini zuwɛnkalo daminɛ na. A tɔgɔ ye Antony Da Silva. A si ye san 46. France ni Portugal jamanadensɛbɛw b’a bolo.  O y’a sɔrɔ Emerse FAE ni Côte d’Ivoire ntolantannaw tun bɛ Etats-Unis, walasa ka tali kɛ diɲɛ ntolantan ɲɔgɔndanba la (coupe du coupe). A yɛrɛ tun t’a dɔn ko yanni kalo damanin dɔrɔn, a bɛna bɔ olu ka dagekaramɔgɔya la.

Jɔn de bɛ ka nin kunnafoni kolon carin?

Zuluyekalo laban na, waati min na, Côte d’Ivoire degekaramɔgɔ Emerse FAE ka saratisɛbɛ ma se ka lakuraya, kumaw cayara bɔlɔlɔ forobakumayɔrɔw kan. O waati de la, kɛnɛ dɔ y’a sɛbɛn Threads forobabarokɛyɔrɔ la. A tigi tun bɛ k’a yɛrɛ ɲininkan ko : Ni Mali dun ye Emerse FAE ta degekaramɔgɔya la sisan dun? 

Ɲininkali tun don. Ŋunuŋunukanw bɔra o de kan ka na laban ka fanga sɔrɔ. Tiktok jakɛlaw y’u sinsin o de kan ka kunnafoni kolon in carin. U caman ka laɲini tɛ dɔwɛrɛ ye, ka jama sɔrɔ ani mɔgɔw k’u ka jaw kanu.